Wann es gliezt obenn ⁋ Stanndt ab das will ich lobenn ⁋
Daß ist der besten streich einer, der in der gantzen Zedell sthatt, welcher den spruch recht versiett, der ist ein Fechter, als bald oder offt es oben glietzt vnd blizt ⁋ das ist wen dir ein hocher streich ann dein schwert ist kumen oder gangen so standt ab, das ist suchs fluchs vnnd baldt ein blöße einem oren mit einer zwirch dem Lincken zu, mit langer schneid dem rechten, das treib durch das gantz fechtenn won dir ein streich am schwert klingt, so stand ab, such zwierch, Plößenn, schneidt, schlach vmb, reiß aus zu dem schnappen schneidt heimlich, Indes verflieg oder raumbt, vnnd was dir des mans blöße zu lest sej bald bedecht vergiß der trüt nicht ⁋
Krumpt mit kurtz haw
Durch wechsell domit schaw
Merck wan dir einer von seiner rechten achsel zuhawett so thu als woltest du mit dem krumphaw das ist mit halber schneidt auff sein schwert binden, thu es nit sonnder verfel dein schwert vnder seinem kurtz durch ist ein heimlich guter durch ganng Izt stich an seiner brust zu der rechten ⁋ du must woll gegen seiner tretten, die lang schneidt krumpt übersich am stich izt such blöß las dz schwert nider fliegen Ist der mann nochet bej dier, so truck die handt, schneidt Indes reis ab verfell einer blöß zu, haw dich mit sterck hinweck, vergiß der trüt nicht ⁋
Krumpt wer dich irrett ⁋
der edel krieg in verfiert ⁋
das er firwer ⁋
nicht weis wo er sej ohn gfer ⁋
