Page:MS Bibl. 2465 024r.jpg

Summa was von Oben geht es werd nach dem köpf oder armen vnd fieß gehawen, so heist es ein oberhaw. Also was von der achsel schlims auf den man wirdt gehawen es sey zum gesicht, oder leib, hoch oder nider, so heist es ein Zornhaw, man mag auch den haw mit krummer oder gerader schneiden thun, Auß welcher vrsach auch die namen der hew verendert werden wiewol auch die glider zu welchen gehawen wirdt die namen verendern, wie Im Rappier hernach volgt, vnd bleib doch der haw Im grundt ein Zornhaw oder mittelhaw Also ist es mit allen geschaffenn.

Weitter sol man mercken, so man der vier haw einen durch die gegehorendt Linien hawet es sey oben oder mittel, so sol man alwegen die nechst linien widerumb auff hawen zur versatzung. Also Im zufechten khum ich In stier vnd haw ein Mittelhaw durch sein gesicht mit sterck, als baldt haw ich von meiner Lincken durch die vnder Linien zur versatzung gegen seiner handt.