Page:MS Bibl. 2465 025v.jpg

So du inn der hutt des Ebers stehest, so thrit vnnd hawe vonn deiner rechtenn durch sein gesicht doch fell, das dein dusack in lincken wechsell kumpt, Inndes haw vonn deiner lincken vonn vnndenn überzwerch, starck nach seiner spindell ob er gleich schlecht so verlezt er sich dester hartter, denn drütten vonn deiner rechtenn durch seinn gesicht ⁋ ⁋

Ein gut stuck vff das nachhauen aus der wacht ⁋

Ittem so du inn der hut des Ebers stehst, thrit vnnd haw vor im durch wie obenn gemelt, Als baldt er noch, hawett, so far behenndt vbersich vnnd fanng denn streich auff dj sterck deins dusackens, greiff Indes gleich mit deiner Lincken offener handt vnder deinn dusackenn ann sein gehilz domit du inn auff haltest, vnd schlag in zu dem fürgesezten schenckell ⁋

Ittem hawett dür einer vonn obenn zuu, so versezt wie vor, vnnd far mit deiner Linckenn offner handt vnder deiner versazung ann sein gehilz wie obenn gemelt, vnd hawe krumpt über zuu sein Lincken ohr, Inndes far vnnden durch die nasenn vnnd schnell vonn außenn über sein rechtenn arm zum kopff, vber dj handt, Reiß im sein arm auff dein recht seitten, las neben seim rechtenn ablauffenn vnnd hawe lang noch ⁋