Begegnett dür einer inn dem schnütt, so thrüt vnnd hawe vonn deiner rechten krumpt, vnnder seinem nechtenn arm durch, das du im seinn knichel rierest mit dem krumenn Ort ⁋ denn anndern nim starck mit der flech oberhalb seinem rechtenn arm vonn deiner Linckenn wegk, das deinn wehr wüder vmb flieg vber denn haupt, mit dem stich vber seinn rechten arm zum gesicht, Wertt Er daß so hawe Im geschwinndt zum gesicht ⁋
Einn annders ⁋
Im zuuganng haw im mit Lannger schneidt starck durch sein gesicht, daß dein dusacke wüder über deinn haupt schüeße über zwerch zur versazung vonn deiner rechtenn, thritt Inndes behenndt mit deim Linckenn vmb sein rechtenn, vnnd haw Im krumpt vber sein rechtenn arm zum kopff, Wertt ers so hawe im vornenn zum gesicht, oder hawe Im krumpt über zum Linnckenn auff denn kopff ⁋
Merck, Wann dür einer krumpt über zum kopff hawett, so sez im mit dem schnitt ab von deiner rechtenn greüff Inndes mit deiner Linckenn hanndt über dein rechte, Inn sein rechte hanndt bej dem gelennck, far mit dem gehilz vonn vnnden auff vnd brich übersich wie hernach gemolt stehtt ⁋
