vonn deiner linckenn, vber sein rehten arm außzwendig, aus dieser regell sindt viel behender list zunemmen mit verfierenn ⁋
Die annder regell ist also wann dür einer zu hawett vonn obenn, so far mit dem bogenn übersich gegenn seinem streich, wennde im also denn schlag auff dein lincke seittenn ab, gieb gleich mit den leib woll dem dusackenn nach auff dein linck seitten, Inndes thrit behendt wüder zu im, vnnd haw außwendig über sein rehten arm, zuck das gehilz behendt wüder übersich zu dür, vnnd hawe im durh daß gesicht ⁋
Die drütt regell ist dise, so dür einer zu hawett so merck ob er dür nit zu nache sej dz du im thrauest aus dem schlag zu weichenn, so zuck dein wehr übersich zu dür, vnnd weüch mit dem fordenn fus zu dem hindern auß seim haw, vnnd nim also sein streich mit keiner versazung ann, als baldt sein streich verfelt gegenn der erdenn, so folg im der blöß noch, mit einem langen zu thrit, also ist mancher erlangt wordenn ⁋
