Page:MS Bibl. 2465 022v.jpg

Zum andern sein die hew welcher ob ich ihr wol bey die sechzehen setzen wirdt so sein ihr doch nit mehr dhan vier haubt hew Auß welchen die andern alle ihren vhrsprung haben, nemlich der erst der Oberhaw, der Ander der Zornhaw, der dritt, Mittelhaw, der virt ein vnderhaw, dan so seltzam oder krump wurdt keiner kein haw hawen, er muß ihn entweders von oben, oder schlim Item vberzwerch, oder von vnden bringen Das aber so vielerlei namen, vnd enderung der hew hew[!] sein, komptt dho her, oder benhamet sie das mancherley furnhemen, des, der ihn hawet, des zum exempel, so ich für einem sthe. In gleicher arbeit, vnd khan ihm nirgendt zur bloß khommen, so haw ich mit sterck von oben ein bochhaw hinein, mit das ich dreffen wolle, oder kenen, sonder das ich also anboch, vnd ihn damit reitze zu hawen, damit er mir auff thue, vnd raum gebe zu einer blöß, welcher, ob es wol ein oberhaw ist, hat der haw doch den namen, Bochaw, darumb das mein furnhemen nhur ist an zubochen, ob mir auff gethon wurde ⁋

Von den Blössen

Zum dritten sol man der blössen wahr nemen vnd sie lernen erkhennen dahn des mans armen, darin er die wehr firet, Also man sol acht haben wan der man mit den armen zu hoch auff feret, so ist er vnden bloßen