Page:MS Bibl. 2465 025r.jpg

Hawet dür aber einer außwendig zu deiner rechten es sej mit schnelen oder flechenn, so thritt mit dein lincken fus auff sein Recht seitten, vnd hawe Im außwendig über sein rechten arm, zwenn hocher streich werett ers aber so hawe im vornen zum gesicht ⁋

Regell ⁋

Merck die wacht ist ein hutt, daraus du einen überlanngen sollt mit über hew also es hauwe dür einer außenn oder Inwendig so thritt aus seim streich, vnd hauwe im mit langer schneidt zu dem kopff vnnd seiner hanndt ⁋ Inwendig mit einem gnedenn scheidell haw, Außwenndig mit einem Winndhaw ⁋

Bruch auff die wacht ⁋

Eber ⁋

Merck wann du einenn in der wacht finndest, so stell dich in die hutt des des[!] Ebers so baldt er sein dusackenn in die lufft pringt, so thritt mit dem rechten zwischen dür vnnd im durch, auff sein recht seitten, hawe Jnndes außen über sein rechten arm zum kopff mit ein windthaw, thrit baldt zuu ruck vnnd hawe ein apicem zum kopff oder durch gesicht ein Oberhauw ⁋

Ein annder bruch ⁋