Zum anndern hawett dür einer außenn zum leib, zw deiner rehtenn es sej vndenn oder obenn, so thrit mit deim linckenn fuß zu seiner rehtenn vnd hewe vonn außenn über sein Rechtenn arm zum kopff oder mit dempffen hart zur hanndt von oben, Inndes es gliz so schieb im denn ortt Inn sein gesicht wertt er den stost, so hawe zm[!] zum gesicht, oder hab acht wann er sein arm in die lufft ruckt so hawe ein brumer zu seinem arm ⁋
Wann er aber nit schlagenn wolt, so treib vber dein linck fürgesezt pein ein geschwindenn threibhaw durch sein gesicht, domit zwingest du Inn eintweder zu schlagenn oder weichenn, damit du dein fortheill ersichest ⁋
Ittem so du im rehtenn Zorn stehest, so verschieb über dein haupt zur versazung Inndes thrit mit deim rechtenn zu im, vnnd schlauder vonn der rechtenn vnd lincken zwenn starcken hew mit halber schneidt vonn vnden, vnnd behendt ein mittelhaw darauff, fanng im denn Rechtenn arm mit deim dusackenn ⁋
