Ittem wann du also einem außenn über sein rechtten arm schlechst wie obenm gemelt, vnnd er fert hoch übersich, so thrit behenndt aus vnd haw im krumpt vornen hinein zum gesicht ⁋
Ein geschwindt stuck ⁋
Ittem vmbgreiff dein handt habenn, das du dein dusackenn krumb habest wie obenn gemelt, haw also sprungs weis vonn deiner rechten ein hochen streich über die hanndt über sein bogenn hinein das dein rechte seitten woll an sein lincke seittenn kum im schlag, haw in eim schnell wider vmb vnden hinein zum gesicht das dein hefft hoch pleibt haw dich behendt kurtz wegk. ⁋
Ittem wann einer im bogenn stehett, vnnd lasst den ort vnndersich hangenn, so thrit vnnd haw vonn deiner rechtenn in die schwech seines dusackens widder sein arm durch, das dein dusackenn auff deim Lincke seitten kumpt nim Inndes mit der flech über sein arm wegk, vonn deiner lincken vnd haw lanng nach, der blöß zuu nachett bej seiner hanndt ⁋
