Ein sehr guth stuck durch drey Mittelhew, durch welche viel verletzt seindt worden.
So du einem also anbindest mit halber schneidt vber die handt, vff sein bogen, so merck ob es recht glitscht oder rirt, so schnap vmb, vnd thu als woltest mit halber schneidt zum Rechten ohr schlagen, thu es nit, sonder zuck wider vmb dein haubt, vnd haw den ersten Mittelhaw von deiner Rechten ober halb seinem gefeß durch sein gesicht, den andern vonn deiner Lincken vnder seiner handt starck durch, den dritten von deiner Rechten zu seinem gesicht wider hinein. ⁋
Zwinger zweierley
Der erst ist ein außnhemen von deiner lincken, vnd ein abwenden mit der flech, Der ander ist ein starcker haw von deiner lincke durch sein gesicht mit langer schneidt, mit einem zwifachen streich durch das kreutz. ⁋
Item sthestu Im lincken Stier, so thrit mit dem Rechten furbas, vnd hawe mit sterck zu seinem Rechten arm von vnden, damit reitzest ihn zuschlagen, In dem er auff geht, sein handt In die luft bringt zum streich, so hawe ihm behendt neben seiner handt Inwendig zu seinem gesicht. ⁋
