Page:MS Bibl. 2465 048v.jpg

Von den Blössen

Im Rapier fechten ist sonderlich achtung zuhaben, auff die vier theil des mans, Nemlich zur lincken vnd Rechten, vnden vnd oberhalb dem girtel, vnd werden die 2 vberhalb dem girtel genendt der Ochs, die vndern zwo werden genendt der pflug, deren sol man sich also gebrauchen, Im zufechten hab acht In welchem theil er sein wehr hatt, vnder oder oben oder den welchem theil er sein streich oder stich bringt, zum andern hab acht auff welchem theil du den man ahm figlichsten angreiffenn mogest des merck ein Exempel, so der man sein wehr vff seiner Rechten In der obern blöß hatt, so arbeitte Im zu seiner Lincken vndern blöß mit stich oder hewen damit treibstu In das er muss arbeitten oder wehren, vnd plossen damit sein rechte obere blöß ⁋

Item hatt er sein wehr auff seiner lincken obern blöß, so stich ihm zur rechten als baldt er versetzt, so windt vnden durch zu seiner lincken bloß von welcher er khomen ist, Weitter so einer sein wehr Im obern oder vndern theil feldt zur huot, so haw oder stich ihm starcks oben zum gesicht das muß er wehren als baldt er auff fehrt zu versetzen, so windt vnden durch, vnd stich als baldt vnden zum leib oder hufft. ⁋