Merck wan dür einer vnden zu sticht, so thrit mit deim lincken fuß auff sein rechten seitten vnd setz im sein stich vonn deiner lincken gegen deiner rechten vonn oben zwischen dür vnnd Im durch die bastej ab thrit vnnd stich im vnnder seiner wechr hinein zum gemecht ⁋
Weitter sticht dür einer vnden zu, so du also im lincken ochsen stehest, so thirt mit deim lincken fus woll auff sein recht, wie vor, setz im sein stich von deiner Lincken vndersich gegen deiner rechten ab, so stehest im rechten Pflug, stich im aus dem Pflug übersich auf zu seim gesicht dz mus er wechren, so thrit vnd stich im mit verkerter handt vnder seim arm zur hufft zuck dein gefes wider zu dir vnd hew von deiner lincken ein wechr streich auf sein recht achsel durch
Ittem sticht dir einer zum gesicht oder brust so nim den stich von vnden neben deiner lincken mit kurtzer schneidt durch sein recht mit stercke aus, das dein wechr oben wider vmb dein haupt lauffe, vnnd hawe im auswendig zu seim rechten schenckel, spertt er den haw so stich im bechendt über die handt zum gesicht, spert er aber nit, so kume durch in rechten wechsell, sticht er dir ferner zu so wend dein gefes übersich vnd nim im sein stich mit der flech durch das fürhenngenn aus vnd stich im über die handt zum gesicht ⁋
