Page:MS Bibl. 2465 051v.jpg

Ittem setz sein stich ab wie oben gelert, bleib also im banndt ann seiner kling vnd wend deinn klingen übersich, gegenn seiner, Reiß aus auff dein linck seitten heb Indes dein gfes übersich vnnd haw von deiner recht inwendig durch sein rechten schenkell, so kumstu in lincken wechsell, sticht er ferner auf dich so spring mit deim lincken fus woll auf sein rechte seitten vnd stich aus dem wechsell gleich mit im hinein, arbeite weüter mit der Eisenporten zu im ⁋

Ittem versetz im sein stich wie vor, heb dein gefes übersich in Lincken ochsenn, vnd nim mit halber schneidt von deiner Lincken durch sein recht, von vnden aus, das dein wechr Ob dem haupt vmflig in rechten ochsen, hawe Indes behendt ein mittelhaw vnden durch sein fieße von deiner rechten durch sein linck, dz dein wechr in Lincken ochsen verschies, nim mit halber schneidt vndersich aus dem lincken ochsen aus, dz dein wechr durch ein ablaufen wider in rechten ochsen verschüz, las bechendt den rechten ochsen mit ausnemen neben deiner Lincken durch lauffen, vnd stich als durch ein dopel auznemen über dein hanndt zu seim gesicht, kum oder schneid, in die eisenport, will er aber nit stehen so du im rechtenn pflug stehst ⁋ So thrit mit deim Lincken fus zu Im, vnnd stich außwendig deim lüncken schenckel durch, dz dein wechr in Lincken ochsenn kum thrit mit deim rechtenn woll auff sein recht vnnd stich im auswenndig seines rechten arms hinein zuck vmb dein haupt vnnd hawe Im durch sein gesicht, so kumest in Lincken wechsell. Vonn dannen nim aus mit halber schneidt ⁋