Page:MS Bibl. 2465 054r.jpg

Item versetz Im dem stich auß dem lincken pflug mit dem hefft vber sich gegenn deiner Rechtenn, vnnd haw als baldt eyn Mittelhaw durch sein füesse von deiner rechten durch das dein weher Inn linckenn ochsen komme. Nimme Inn deß mit zweyen ableüffenn von deiner lincken vnd rechten durch eyn doppel auß, vnd stich vber hand mit eynem zutrit deß lincken, das ist eyn verfüeren Im Rapir

Item so du Im pflug stehest, vnnd er In der eysenn pfortenn, oder sonstenn Inn eyner hut zur linckenn, so stich Im vonn vndenn auß dem pflug außwendig an seiner weher vbersich zum gesicht, Inn dem stich, so er In wehrt, wende dein kling nebenn seiner Rechten vndersich, vnd stiche Im mit verkehrter handt vnden hinein zum leibe, Inn deß hawe vonn deiner linckenn, eyn weher streych zu seiner Rechten.

Item stehest du Im linckenn pflug, stichet oder hawet dir eyner obenn zw, so versetze übersich das du Inn Rechtenn ochsenn kommest, Mutier den ochsenn vonn vndenn Inn Rechtenn pflug, vnnd stiche Ihm vonn vndenn zu dem gefeß zu seiner handt, Inn deß er aber der hanndt acht nimpt sie zw beschirmen so stiche Ihm vber der hanndt eyn zum gesicht, ⁋