Page:MS Bibl. 2465 055r.jpg

Ittem sticht dür einer außwendig zum rechten arm so thrit mit dem lincken woll vff sein recht seitt, vnd dempff oben druff, wie vor gelert thrit, vnd stich Im ann seiner klingen über auff zum gesicht, werth er den stich, vnd fert hoch vff mit seiner versatzung, so stich Im vnder der vchsenn hinein, versez er fürbas den stich, so ruck dein gefes übersich, vnnd stich im über die handt von oben über sein versatzung hinein, vnnd haw im zum rechtenn bein ⁋

Abschneidenn

Ittem dempff Im sein herkhummenden stich wie vor, aber im dempffenn so las dein klingenn schnidts weis auff seiner klingen neben dür aus rauschenn, in eim flug, stich oder haw Im wider, von der selbene seitten hinein ⁋

Ittem sthestu Inn der Eisennport, sticht dür einer auswendig zum rechten arm, so nim mit halber schneidt vndersich auff dein recht seitten aus, das dein kling neben deiner Rechten überlauft gleich dem rechtenn Ochsenn, Inndes nim denn anndern auch aus durch ein ablauffenn vonn deiner rechten auff dein Linck, vnnd stich gleich mit behenndt über die hanndt sampt einem zu thrit dises stuck geht zu beüdenn Seittenn ⁋