Page:MS Bibl. 2465 056r.jpg

Stich wechslenn vnd Mutieren

Stehestu In der eysen pfort, vnnd dein gegen part auch, so stich Im außwendig vber sein rechten arm vber dein handt hineyn, vnd Im stiche hebe dein hefft wol In die höhe, Als baldt er dem stich nach wischet zuwehren, so laß dein spitz vndersich sincken, vber deiner handt, vnd stiche Ihm behendt vnder dem arm zur hüffte, wehret er aber so stiche Ihm wider vber den arm zum gesicht also verkehr dann vber sich In vndern, Den vndern In obern, magst ein haw ein wechslen wann du wilt.

Den ochsenn vnd pflug zusamen stechen. ⁋

Item begegnet dir eyner In der eysen pforten, so stich Im aus dem Rechten pflug Innwendig seiner klingenn von vndenn vff zw seinem gesicht, In deß heeb dein gefeß vbersich vnd Mutiere den vndern In eyn ober stich, hawe Inn eym abtritte zur nechstenn blöße.

Eynn verfüerung.

Merck lest dich eyner am eüserstenn seiner klingenn, von deiner Rechten: so stich Im von vnden auff Inwendig seines gesichts für über, das dein Rappir neben deiner Rechten vmblaufft, gleich eyner Rinde, thu eben als woltest Im zur rechten achsel stechen, thus es aber nit, sonder stich Im wider Inwendig zum leibe. ⁋