Vonn dem thritten ⁋
Ittem stehestu vff der linie mit dein bustaben A verzeichnet, vnnd er des gleichen, wie die Füegur außweist, vnnd Er dür angebunden hatt von seiner Lincken gegenn deiner rechtenn, sticht Er dür dan zw deinem arm gerads zw, so stich mit Im gleich hinein vnd Indes thrit mit deinem Linckenn fus auff das B zur Lincken so thrift dein ort vnnd seins gett fel ⁋
Ittem stett ir beid wie vor aufgemelter linie A vnd habt von Ewerer rechten angebunden sticht er dan gerad auf dich zu, so stich mit im gleich hinein, im stich thrit mit deim Linckenn hinder deinen rechten auff das B zur rechten, vnd folg mit dem rechten fus fürter auf dz C zur rechten so geht sein stich fel vnnd deiner thrüfft, So er aber auch thrit wie du gethretten bist so versezenn die stich beid Einanden ⁋
Also ist es auch mitgleichen hewen welcher den andern ein spaden über thrit das haw geht ann aber von den thriten lechrt die erfarung vnd übung beßer dan man dauon schreiben khan ⁋
Basteij ist ein hut vnden für die fus gleich dem verhengen also halt dein wehr mit gstreckten arm vor dür, das die spietz vndersich gegen der Erden hangt damit sperrest einem sein wechr, das er nit durch mag khomen, wie man sie brauchen soll ist bis her gelert wordenn ⁋
Verhangen ist also, halt die wehr stracks vor dem gsicht dz dj spitz vndersich hangt bis zum girtel, Bastej vnd verhengen ist einander gleich, allein dz die bastej, ein schirm vnden, dz verhengen ein schirm vonn gesicht ⁋
