Page:MS Bibl. 2465 062r.jpg

kummen megest oder ergreiff bechendt mit dem dolchen sein klingen sper im die oder raum dür zu seiner blöß ⁋ So du inn der Eisenport stehst Im Rapïr vnnd dolchenn ⁋

Erstlich sticht dir einer zum Lincken Pflug, so versez mit deim dolchen vndersich von dür, vnnd stich im zu sein Lincken ochsen, als baldt er mit seim dolchen nach wichst zuuersezenn, so wehsell mit deim ort, neben seinem Lincken arm durch, vnnd stich im vnden auff zum Pfluger versezt er fürbas, so far auff mit deim Rapir vnnd stich im von obenn zwischenn sein beden armen hinein, mit einem Ris durch, vnnd stich Im über die handt zum gesicht bleib Indes mit dem dolchen vor dem gesicht, bewar domit fürnemlich, dein lincken Pflug vnnd ochsenn das ist die linck seittenn vnndenn vnnd Obenn ⁋

Sticht oder hawt dür einer zum Lincken ohsenn, so vnder far mit deim dolchen, vnd stich im vnder deim Lincken arm durch zu seiner rechtenn Plöß, als baldt haw von deiner Lincken vnder deim arm zu seim für geseztenn bein, verwar Indes dein Obern leib mit dem dolchenn, Indes stich behendt wider oben hinein mit eim rüs zum gesicht wie gelert ⁋

Ittem hawtt oder sticht dür Einer zum rechten Ochsenn, so sez im den stich oder haw ab mit deiner klingen, Inndes far behendt mit deinem dolchenn, vnnder sein klingen wennd Im die ab vff dein Linck seittenn, vnnd haw Ein vnder haw von deiner Rechtenn zw seiner Linckenn hanndt dann Er denn dolchen hatt, Inndes las dein klingen wider neben deiner rehten zu ruck ablauffen vnnd haw im zwischen seinenn beidenn wehrenn hinein zum gesicht ⁋