arm oder dolchen durch sein gesicht hawest so Solu als dann herwüder von deiner Rechtenn vnnder dem Linckenn arm zw seim Fürgeseztenn fus hawen, Inn dem allem so offt zu Ein blöß Ersichest zum stich, so soltu behendiglich stechenn, vnnd dich behenndt mit Ein wechr streich wüder früstenn ⁋
Ittem schawe wenn du Einen Im driangel vmb thretten hast auff sein recht, so las dein Linckenn arm sincken vnnd haw über deinen dolchen wan deiner Lincken zu seiner rechten starck, durch sein füße, Indes far behend auff mit dem dolchen vnd stich von deiner rechten vnden auf zwischen seinen beiden wehrenn, starck, mit einem threnner, oder reis übersich durch, hastu Indes nach kein blöße ersehen zum stich, so haw Im von deiner rehten, zum schenckel vnder deinem arm durch, so stehestu in der kreutzhut, von danen so nim mit halber schneid vor deinem dolchen aus, dz dein wehr vmblaufft Inn rechten Ochsenn, vnnd stich Im als dann nach dem gsicht oder brust mit einem thrit ⁋ oder nach gelegenheitt ⁋
Im zu fechten kum mit dem rechten alzeit vor, fürden dolchen hoch vonn gesicht, hawe Indes vor deim dolchen über, halbweg zu seim rechten fus auzwendig, zuck oder verziege denn hew behend wider in ein stich, vnd thraw im den stich über die handt von deiner lincken zu seim gesicht, zuck Indes den gethrauten stich wider, hewe im zu seim für geseztenn bein, zu welchem du gethrawet hast, die verfirung gehett zu beiden seitten
