Page:MS Bibl. 2465 065r.jpg

Die Erst Regell ⁋

Ittem so dich Einer zorniglich überlaufft mit Eim oberchaw, so chawe mit Einem schlimenn zornhaw seinen herkhumenden streich vonn dür wegk, nachett In seiner sterck, domüt Er brelestu Im sein wehr vnnd hanndt, das zu frölich noch Einer blös hawenn kannst Ehe Er sich wüder Recht Erhalt, merck aber In dem streich must du woll nach deim haw thretten, als baldt du Empfindest das du Im sein wechr geschwehtt hast, behenndt nach hawen, zuck behenndt übersich zum absezenn, so dürs nit beßer wendenn khann vnnd stich vonn dür, So dür aber Einer Ein Zornchaw oder mittelhaw hawett, so spring woll aus seim haw, vnnd haw mit Einem starcken dempfhew von oben drauff, auch auff sein sterck, Ruck Inndes behenndt dein gefes übersich, vnnd hew zur nechstenn blös, hawett Er dür vonn vnnden so hew desgleichen vonn oben darauff als baltt Es glitzt vnnd Er sein hefft übersich Ruck, weitter zu schlagen so haw Indes vnden noch oder folg Im von vnden auff mit Ein stich zur blös ⁋

Die annder Regell ⁋

Item wann dür Einer nit gleich zu hawen will, sonder deines streichs Ewarttenn vnnd mit lüstenn Im nocht mit hewen oder stichen folgen, so thu Im also, schaw Im was versazung Erwartt, Inn der obern oder vndern hutt, helt Er sein wehr Inn der obern hutten Eine, so hawe Im schlims vonn vnnden auff starck übersich durch, denn anndern Ein mitelhaw von der andem seitten durch sein gesicht, den dritten starck von oben, so du die drej streich geschicklich vnd starck auf ein ander durch hauest, wirdt dür mit miche versezt werden, so dür aber der hew Einer gesteckt wirdt mit Ein schnidt oder absezt