wechr überzwerch vor dür die spitz vor deim Lincken fus auff die Erden schlecht Er mit gewaldt auff dich, so fahr übersich mit deiner wehr vnnd spring Im vnnder sein streich Rucke, dich, Im sprung mit dem haupt aus seim streich, vnnd las sein streich auff deiner wechr abglitzen, vnnd greüff Eilentz mit der Lüncken hand In sein stangen Jnndes haw bechendt zu seiner handt,
Ittem sticht Einer auff dich vnnd du hast dein wehr vnden wie itz gelertt, so fahr auff vnd setz Im den stich ab übersich über dein haupt zucktt, Indes, Er aus deiner versazung vnnd sticht wider, so wende vonn oben aus dem ohsem sein ann dem stich aus auf dein Lincken seittenn mit Einen großen zu sprung, vnnd Erwisch Im die stang wie vor, vff dise was magst dich zur nett wehren gegen eim langen spis, dan Inn schertz weis ist solch ding nit woll zu brauchen sonderlich gegen die welche der zucken bericht sündt wo aber Einer zornüglich auff dich thringt, sindt solche stuck guth vnnd gonnt woll ann,
Ittem du magst dich auch Inn der Eill Inn ochsenn schicken, vnnd von danen abwenden, durch das verhengen, merck aber das du behenndiglich zu Im oder vnder sein wehr solt Eilen, dan Ir mehr Er lufft hett in der weütte von dir, Ir weniger du Im angewinest so Er aber dir Ja entspringt vnd stiche so haw mit Eim schlimen zornhaw sein stich wegk schlaht er so spring Im aus dem streich zu Im ⁋
Ein kurtz vnnd gut Rapier Fechtenn, welches ich aus disen bis hie her gelertem fechttenn, Sumanischer weis ausgezogen hab, als denn kernn daraus ⁋
