Page:MS Bibl. 2465 066av.jpg

deiner Lincken dise drej hew sollenn bechendt In Einander gon, oder gethriben wenden, das geett zu beiden seitten, Der ander wechsell ist also, wan du Im Lincken Wechsel stehest so nim mit der flech aus, das dein wehr vmb den kopff laufft, vnd haw Im durch sein Rechten so kumestu Inn Rechten wechsell, von denen nim wider aus, mit der flech, vnnd hew Im durch sein Lincken, so kumestu wüder In Lincken wechsell, dz ist der ander wechsel haw.

Der dritt wechsellhaw ist also, steht im Rechten wechsell vnd haw Im von der Rechten durch sein gesicht das deine wehr auff dein Lincken seitten kumpt In die nebenhutt von danen haw Ein mittelhaw, durch sein fies, so kumpt dein wehr auff dein Rechten seitten, von der selben haw bechendt ein schlimen haw zum gesicht

Ittem steh Im vor gemolten wehsel vnnd haw den Ersten durch sein fies, von deiner Rechten, den anndern ein mittelhaw durch sein gesicht von deiner Lincken den dritten wüder von deiner Rechten schlims zu seim gesicht, diser wehsellhaw geht von beüden seitten.

Wechsell zur Rechten oder die reht neben hutt

Merck stehestu in dem wechsell zu deiner Rechten sticht oder hawett Er von oben so nim aus mit der flech müt strackenn arm das dein Spietz vor sein gesicht fürüberraußent so kumpt dein wechr In Lincken ochsen, las dein Spietz vndersich sincken, vnnd far mit der Spitz vnder seim arm durch Inwendig, zu seim leib, heb Indes dein gefes übersich vnd las den ort vndersich sincken vnnd Ruck damit dein gefes sampt dem wehr auff dein Lincken seitten, von denen hew ein wechr streich durch sein Rechten, so kumestu wüder Inn denn Rechenn wechsell:

Ittem nim aus wie vor vnnd hew im zu sein fürgesezten Inwendigen bein, so kumestu