Page:MS Bibl. 2465 065v.jpg

so schnap mit dem ortt bechendt vmb vnd stich zur nechsten blös, oder bleib mit der wehr auff seiner als baldt Er abzuckt, so stich noch oder gehe Im Inn vnnd greüff mit deiner Lincken hannd nAch seim gefes, welchs dir am Ersten werden khann ⁋

Ittem so dür Einer auff dein streih wartten will, wie jetz gemelt, so stelle dich mit geberden als woltest du zorniglich von oben zu seiner Lincken hawen, als baldt du vermerckest das Er dem streich entgegen wihst so verzuck vnd haw zu seiner Rehten vnder blös übereck, auff dise weis magstu dein hew verzucken ir von Einer blös zur andern vnd dorin stehen noch gelegenheitt vnd deinen gefallen ⁋

Die dritt Regell ⁋

Helt Er sein wechr zu hoch Inn der versazung so haw Im behendt durch den fus vnd merck als baldt Er sein handt senck, deim haw noch, oder der blös, so hawe Im behendt über der wechr zum gesicht, oder in dem Er sein handt senckt dem streich nach, so stich im über dem arm hinein zum gesicht,

Ittem helt Einer sein handt nider so hewe mit einem mittelhaw von der Rechten durch sein gesicht, als baldt Er übersich wischst, so hew wüder von der Lincken vnden durch die fis, denn dritten wüder schlims zum kopff ⁋

Ittem hew Im Inwendig von oben zu der hendt durch den andern auswendig zu seim fus, oder arm

Ittem hew Im auswendig zum arm, so baldt Er dem haw noch wischt so fahr vnden durch vnd stich Im zum leib ⁋

Ittem haw Im vonn deiner Rechten durch zuu fießen vnnd draw Im denn stich auswendig über seim Rechten arm über dein hand, zuck vnd haw Im auswendig zum schenckell, dise gehtt zu beiden seitten ⁋