Du magst auch Im solchem Einlauffen mit dem hindernn orth zum gesicht arbeitten ⁋
Merck In allen winden hab acht auff welcher seitten du im mit dem lanngen orth hinein stost, so windt mit dem andern hindern ort mit einem einlauf zur andern blös vnder oder oberhalb dem arm.
Ittem oberhalb dem arm magstu Im mit dem hindern ort vmb den hals vnnd mit dem fus hinder thretten vnd werffen oder annder Rinngen ann die hanndt nemenn ⁋
Ittem so dür Einer Ein lauffenn will, so zuck die stanngen kurtz ann dich mit Einem sprunng zu Ruck vnnd las denn orth sincken dz die hinnder hanndt hoch khum, so kumbt deinn stanng zwischenn dür vnnd Im In das verhenngenn, stos In als denn für die brust vonn dür wegk ⁋
Erklerung ettlicher streich in der stangen hürn schlag wann du einem ann fordestenn anbindest so ruck die handt übersich, vnnd gieb der stangen ein schwung mit der Lincken handt vnnd schlag im oben zum kopff, kreutz schlag ist wann du im anbinden zuckest vnd schlegest mit beiden henden zu seim fürgeseztenn arm, vnnd vonn der anndern seitten dargegen ⁋,
Rundschlag will ich sparen in die helpartten, schefferstreich ist der über die hanndt, durch schlag ist so du im zu seim für geseztenn bein durch schlegest vnnd auff der andern seütten wüder hinein ⁋
