Merck wann dür Einer also ein hochen Rundenstreich bringt, das du must übersich faren mit den armen denn streich zu versezenn, so hab acht als baldt Er denn haw verkhertt zu Einem stich so bleib mit den armen hoch, vnd senck das blatt neben deiner Lincken vndersich, wennd Im also denn stich von deiner Lincken, zwischen dür vnnd Im ab, durch das verhenngen, vnnd stich von vndenn auff zuu seim bauch ⁋
Ittem nim also ein hochen Rundtstreich vonn deiner Lincken als baldt du merkest das Er auff fehrtt denn streich zu entpfanngen, so zuck den streich Inn der lufft, vnnd haw Im schlim zu seinem fürgesezten knie, So khumestu durch auff dein Rechte seittenn, sticht Er ferner nach oder nit so stich Im bechendt zur seiner linckenn mit eim abthritt ⁋
Ittem stich im zu seiner Rechtenn zum gesicht wertt er den stich, so las vmb lauffen zu Eim Rundtstreich vnnd zuck vmb dein haupt, hawe Im mit gekreutzigten zu seim Lincken arm, zuck bechenndt vnnd stich Im zur blös Inwendig oder auswendig oder helt dich der Reißen mit abschneiden
