Page:MS Bibl. 2465 089r.jpg

Fechttenn Im lanngen Spies

Felt leger weist dij folgett figur, felt leger mit langer stangen last den hindern ort nihtzt fürgehnn Stost dür Einer zur lincken, so thritt auff dein Recht vnnd stich gleich mit Im hinein, Inn dem stos wend die lang schneidt gegen seiner stangen sticht Er dir zur Rechten, so thritt auff dein Linck in driangell vnd stich mit Im gleich wie vor Sticht dür aber Einer vnden zum leib, so heb die hinder handt übersich, vnd las das forder ortt nach der Erden sincken, schlag Im den stos zwischen dür vnd Im aus gegenn deiner Rechten wennd bechendt wüder übersich vnnd stos von deiner Lincken zum gesicht, will dür einer stang aus schlagen so wehsell durch ⁋

Merck wann du Im wechsell oder olber stehest, stost dür dann Einer zw deiner lincken so thritt Im aus auff dein Rechte, vnnd Im aus threttenn so nim mit halber schneidt übersich aus vnd stos gleich mit Im hinein ⁋

So Er dür aber nit stoßenn will, so stos mit Eim fligenden stos zu seim gesicht zuck bechenndt denn stos wüder an dich durch die forder hanndt, Inn die felt hutt über die hanndt vnnd sez Im ab vnnd stos nach ⁋