Page:MS Bibl. 2465 088v.jpg

Merck wann du dich mit eim gewalt streich verhawest oder verfelst, so spring behenndt dem blatt noch, zuck bechenndt mit eim Rüs übersich, oder wann du der helbartten nach springest vonn vnnden auff von dür, oder wan du verfelst so zuck die stanng wüder übersich vmb das haupt vnnd haw ein wechr streich nach, Inn dem streich Ergreiff dein stanng wüder zum stich Er soll auch keiner Inn der helpartten schlagen ochn forwill ⁋

Ittem inn dem Reüßenn halt mas vnnd habe gut achtung, das du nit zu girig[!] zu dür Reüßest das du dür nit selber schadest, sonnder Reis alweg vnndersich oder auff Ein seittenn, sampt folgt Er deim Rüs noch inn dein anngesicht ⁋

Ittem Inn den wünden vnnd Einlauffen bis nitt zu hoch, dan sonst khumest selttenn ochn schadenn doruon, zu den wündenn gehörtt sehr große geschwündügkeütt, So du vermerckest, das dür Einer nitt wündenn Ein lauffen wilt so spring Ein wenig zu Ruck zuck die helbartt kurtz ann dich oder khum Im bechenndt vor zur blöß ⁋