Page:MS Bibl. 2465 006r.jpg

Wann du einem hast angebundenn, so pleib mit dem schnit ann seiner cling vnd wende die halb schneid inwerts zum kopff. Ittem wann du also die halb schneidt hast eingwunden so wenndt mit dem knopff wüder auff die annder seittenn übersich vnnd wende dj halb schneidt außwendig zum kopff vonn vnnden durch die zwüerch ⁋

Durchwendenn

So du einem mit eim zornhaw einhawest in dem es glietz winde mit dem hefft vnden durch Inndes greiff mit dem knopff oben über dj clingen, oder arm reis vndersich oder arbeit ferner nach deinem gefalenn ⁋

Verkerenn ⁋

Verkeren ist wann zwen ein ander anbinden vnnd im anbinden, stost einer seinen schwerts knof vnnder seim rechten arm durch so kumpt er mit geschrenckten henden vber seim beidt arm, oder kumpt ann halb schneidt ann die annder, domit magstu Inn zu dier zwinngenn oder durch lauffenn laßenn ⁋

Wechseln duchwechselnn

Wechselnn gehörtt gegen die Fechter, die zum schwert hawen vnnd nit zum leib denn selbenn soll mann durchwechselnn, also wann du merckest das dir einer deim herkummenden streich begegnen will so zuck vnnd haw zur anndern seiten das heist wechselnn, Ittem thu als woltest obenn ein hawen thu es nit sonnder