Page:MS Bibl. 2465 007v.jpg

So dier einer ann dienn schwertt binndett inn was weg das geschicht, so verker Indes vnnd reiß auß, Ittem greiff mit dem knopff vonn vnndenn auff deiner Linckenn seitten zwischenn sein beidt arm reiß auff dein recht seitten auß ⁋

Vbergreifenn ⁋

Merck so wen zwenn nachett zusamen kumpt, vnnd Alle beidt mit denn armen hoch auff fernt, so verkehr dein recht hanndt am schwertt, vnnd greiff mit der clingenn über seinn beide arm Reiß vnndersich auff ein seüttenn, Ittem magst auch übergreiffen mit dem knopff

Schweßstoßenn ⁋

So Ir zwenn nachett zusamenn kumment, vnnd Jener fertt vff höch mit den armen so las deinn Linck hanndt vom schwertt, faß Inn hinder seim rechten Ellenpogenn vnnd stoß inn von dier ⁋

Düße wertter hab ich darumb nach ein annder ein wenig erklertt damit die nachfolgente stucke dester bester zuuer stehenn seienn, welche nit alein Im schwertt, sonnder auch Inn anderen wechren zumercken vnnd zuuer stehnn

seindt ⁋