Item wer dÿr beÿde Schwerter über den halß wyl stossen so stehe streytlich stil mit deynem rechten peÿn und laß deyn schwert varen bey dem pÿnt Und greÿff mit deÿnem rechten arm hynten umb seyn ruck und ruck zu dyr so hastu in one zweyffel
Hye hebt sych an daß kurze schwert zu dem kampff alß es meÿster Merteyn Hundtfelder gesezt hat
Item nÿm das schwert bey der rechten hant bey dem pÿnt und mit der lyncken greÿf mitten In dy klyngen und gehe vast zu dem man so muß er schlahen oder stechen do kum vor bÿß rysch greÿff frelich und pleÿb nachen
Item stÿch Im Inwenigk zu seinem gesycht wert er dÿr daß so far durch und setz Im an außwenig an seyn gesycht went er dÿr vurbaß und strÿchet dyr den ortt ab so wynt mit deynem knauff Im uber seyn rechte achsel und sprynge mit deynem rechten peyn uber seyn lynckeß und wÿrff in uber ruck
Item wer dÿr daß tut und hat dy den knauff um den halß geworffen so var mit deynner lÿncken hant von unten auff zwÿschen seynner pader armen und schwyng dych dan von Im auff deyn rechte seÿtten und wÿrff In uber dÿ hufth ~
