glosa
Du hast vor gehort wie das der Ochs unnd der Pfluegk sein genant zwei leger oder Hutten so sein sie hie geheissenn die vir plössen der Ochs das sein die obern zwo plos die recht und die linck seit des haupts so ist der Pflug die unnder zwo plos auch die recht und die linck under halb der gürthell des mans die selbigen Vÿr plos soltu mit den thwr[!] schlegen in einem zu fechten alle vir besuchenn
Also schlag die zwer schleg zu den vier Plössen
Wenn du mit dem zufechten zu dem man kumpst so stee mit dem linckn fues vor, Unnd wenn es dir eben ist so spring mit dem rechten fues gegn im woll auf sein lincke seitn unnd schlag in aus der Twer mit kraft gegenn seiner linckenn seÿtenn zur unndern plös das haÿst zum Pflug geschlagn ~Versetzt er so schlag im pald zu der obern plös seiner rechten seiten das haist zu dem Ochsenn und treÿb dann die Twer
