Aber ein leibringen:
Hastu dich mit einnem gefasst, Das du die ein hannt unnten hast, unnd die annder oben, Unnd er dich auch also, So var im mit dem arm denn du unnden hast, Von unnden auf auswenndig oben yber denn arm den er oben hat, Unnd kumb mit deinr obern anndern hant deinr obern hannt zu hilff, Unnd wennt dich von im.
Ein Pruch wider daß Schrenncken.
Merckh, wann dich einer gefasst hat inn den armmen, unnd du ine wider, hastu dann den lincken vues furgesetzt, Ist er dann so gescheit unnd schreit dir mit seinem rehten fues auswenndig hinnter den linckhen, unnd will dich bey den armen daryber rucken, So zuckh den lincken fues, frisch hinter dich auf zu ruckh, unnd faß im domit sein rechtn fues, unnd stos in domit oben fur prust, so felt er.
Aber ein ringen
Schlag aus, mit deiner rechten hannt sein lincke, unnd far im mit der rechten, zwischen die pain vorn durch, und faß inn hinnden bey der Ioppen, Oder auf den armen
