dann du, das du im versetzen must, so merckh als balt deinn schwert mit der versatzunng glitzt an das sein, So such inndes mit dem ort, die negst blöß, oder wart der rinngen, so gwinst im mit der versatzung, das ist mit dem nach sein var ab.
~Wie man sol abtretn zu Kampf.
Wiß das du dem kampffechtn nicht mer dann ein abtrit unnd ein zu trit gehert, Und sunst vest gestannden, Darumb das man nit müet wert, in dem harnisch, Das vernim also, Ist das er dich ÿbereillt hat, das du mit dem schwert, oder sunst zu kainer versatzung kumen magst, So trit bald zu ruckh, mit dem vorgesatztn fues, Unnd wart das du im inndes balt wider ansetzest, Oder begreiffst mit rinngen, ~Mit einem zutrit desselben fues, domit du vor abgetreten pist.
