Junng Ritter Leren
Got lieb haben / fraẅen vnd Junckhfrawen/ Eern.
so wechst dein Lerrn /
Vnnd Leren
ding das sich zieret /
Vnnd Inn kriegen seer hoffieret /
Rinngens guote fesser /
Glorien schwert vnnd messer /
Mannlichen bederben /
Vnnd Inn anndern hennden verderben /
Haw darein vnnd triffe. dar
lasse hengen. vnnd lasse far /
das man dein weÿsz /
mög Maisterlichen Preÿsz.
Hie hiebt sich an ain gute gemaine lere des lanngenn Schwerts doch so ist vil gutter verborgner künst darin beschloszen.
Wiltu Kunnst schawen
Sich Linnckh ganng recht mit hawen
Vnnd Linnckh mit rechten
Ob du starckh gerest fechten.
Die Erst ler des Lanngen Schwerts. Ist das du vor allen dingen die haw recht solt lernen hawen. Ist es annders das du starckh fechten wildt Vnd das vernim also wann du mit dem linckhen fuosz vorsteest vnnd hawest von der rechten seiten So ist der haw falsch vnnd vngerecht. wann die recht seiten bleibt dahinden darumb wirt der haw zukürtz vnnd mag seinnen rechten ganng zu der rechten seiten ~nit gehaben.
