This page has been validated.
Merck daz ander stuckh wenn du daz wilt treiben auf in So setz dein swert mit dem ge hiltz an dein prust vnd lauff mit sterkh in yn daz du chumst mit deinem Swertt zwischen paider schilt durch zu seinem leib wolt er dir den stich mit seinem schilt weren So chum mit deinem schilt deinem swert zehilff So magstu den stich vollpringen Nu merckh den pruch darwider So setz im ab den stich mit deinem swert auf dein Tencke seyten So chumbt dein ort auf sein prust damit hastu Im daz stuckh geprochen daz er dir hat wellen thün –
