This page has been validated.
Merk daz erst stuck in dem langen schilt wenn er dir hat angepunten aus dem oberen haw vnd du Im wider vnd es paid in dem pand stet So schreit mit deinem dencken pain fursich vnd greiff mit deinem schilt mit dem vnteren ort auswendig in sein rechte kniepüg vnd ruck vast an dich So wirffstu in vber rugk wiltu daz stuck prechen So schreit mit deinem dencken fürsich vnd wint mit deinem schilt von vnten auf von deiner dencken seyten Inwendig seins schiltz vnd stös in denn mit deinem schilt zu gantzen seinem leib wo du in trefftz So hastu Im das stuck geprochen damit er dich hat wellen werffen // Die stuck sind ain anvangk aller franckischen recht mit schilt vnd mit kolben vnd auch mit den degen alz dartzu gehört
