[E]in ander Ringen aus dem schwert wen dw mit ainem ein gest vnd dich mit Im sticht [?] dich das er dir geleich sey so schlag Im sein ort aus / vnd lauf mit Im ein vnd thu sam dw In oben an welst fallen vnd welchs pain er dir hat fur gesetzt das ergreiff In mit verwanten arm vnd mit dem andern arm ergreiff In bey der brust vnd prich In oben nider vnd vnten das pain auf vnd wirf In auf de[n] ruck
- [E]in gut kampff ringen auf baid seiten welche dir die gereyt ist magstwes es woll thun / wan dw mit ainem zu Ringen kumpst aus den armen / so ergrwff Im sein linke handt mit deiner rechten handt / vnd zuck Im vber dein kopff vnd far Im durch sein vchssen vnd ergreiff In hinttr werttling sein linkes pain mit deiner linken handt vnd heb Im auf mit dem ruck vnd wirff In auch heb Im den Lincken arm vber den kopff fast
[A]ber ein ansetzen setzt dw aim oben an vnd will er dirs weren vnd streicht dir dein swert vbersich aus so las den knopff fur gen / vnd vnter wind Im sein paid arm vnd setz Im aber dein rechts pain hinter sein lincks pain vnd wirff In oben mit den armen vnd mit dem swert vnter den vchssen for der prust vber das pain an den Ruck
- [E]in lern stuck In gewappenter handt Wen dw dich mit [a]inem stichst so stich Im vnter sein arm ein vnd drit resch In Im vnd setz die klingen bey der mit an sein lincken arm / vnd In dem setzen den ort an dem swert zwischen pain vnd wig an damit das linck pain auf vnd oben mit dem knopff vnd der handt prich In nider vnd wirff In an den Rucken
