Page:MS B.26 017v.png

[E]in gut einlauffen In harnisch mit dem spies Nym den spies vnd das swert zusamen In paid hendt / vnd nym das swert verhollen das man es nit wol merckt vnd drit ainer zu dir mit einem spies vnd hat sein swert In der schaiden stecken / vnd sticht sich mit dir / so slag Im den spiess aus vnd lauff mit dem swert zu Im vnd stich Im auch vier stich vnten auf / ist er nit gewappent mit ainer harnasch pruch / so stich dw In zu todt bis er zv seim swert kumbt / vnd spring den hinter dich das er dich nicht ergrewff / vnd gee dan wider zu Im nach deim fortaill

[A]ber ein gar gut stuck zu gewappenter handt aus dem spies / wen dw zu einem dritzt mit dem spies so nym In kurtzer In die handt den er den sein vnd wen er dich will anstechen so weiss In den stich aus mit dem spies vnd in dem weisen vnd trit zu vnd stich Im dein spies durch den wappenrock zwischen sein pain / vnd las In hangen / was dw den mit Im treibst / so ret In der spies gar fast felst dw aber des rucks so far Im mit dem spies durch sein pain / vnd las den ort auf die erden gen vnd heb den schafft vor dir starck auf vnd auch In mit dem zwischen sein pain der erden vnd wurf in an den Ruck