EIn ander gut Ringen wen dw gefast hast aus den fussen welchen arm er vnten hat auf der seiten setz den selben fuss gen seinem fuss vnd fall Im mit den paid[e]n henden in seinen untern arm vnd trit mit deinem hintern fuss herfur vnd setz Innen hinter sein fus vnd wurff In daruber an den Rucken das thue Reschlich
- EIn gut kampff ringen Wen dw mit aim aus den armen R[i]ngst so zuck Im sein rechte handt vnter dein lincks vchssen vnd fall Im mit deiner recht[e]n handt auch an den arm vnd wurff In ober dein rechts pain auch bey seinem rechten pain auch magstw es thun auf welhe seiten dw wilt / dw den dir die geregt ist
EIn ander gut Ringen wen dw aim geleich gefast hast den arm den dw unter hast auf der seiten das selb pain schlah Im zwischen seine pain vnd wig Im sein pain auf vnd heb Im den arm vast den er vnter deim vchssen hat vnd pring In oben nider so valt er
- EIn ander gut Ringen wen dw mit ainem gleich gefast hast den arm den dw vnter hast mit dem selben arm greiff hintten vbersich / vnd vas In bey den kinpacken vnd brich Im das hawbt vast hinter sich so mus er sich auf rechtten. So wurff In dan vber ein pain hinter sich
