Page:MS B.26 036v.png

Aber ain ander gut Ringen / So gedenck wen dw gen aim gest / das dw In ergreifst bey [ewichen] arm den zuck In vnter dein vchssen vnd heb In fast vnd wurff dich vmb vnd ker Im den Rücken vnd fall mit der andern handt auch an obgenanten arm vnd fal auf das linck knie / vnd wurff In vber das Recht pain oder welhe seiten dir die gerechts ist darnach mustw aber den arm vnter das vchssen fassen / auch wen er dir geleich gefast hast den arm den er vnter hat den heb fast mit der handt vnd dein vchssen vnd wen er dir recht stee / das er dich nit fast heb / So wurff dich Reschlich vmb / vnd fall auf ein knie / vnd wurff In vber das andre pain / Auch mustw es gar reschlich alles thun oder er trit hintersich vnd wurfft dich gar leicht nider thue es reschlich So muss er Ia fallen

EIn gut ringen wen dw mit aim geleich gefast hast das Iederman sein rechten arm vnter hat so fal ye auf ein knie so wirt er Ir / vnd wen er dir oben sey so fall vnten zw Im auf dein rechts knie / vnd setz Im dein lincks pain auss wentiss neben sein rechts pain vnd prich In oben nider mit deiner lincken handt bey seim rechten arm bey der meus vnd mit rechten handt vnter sein lincken vchssen vber dein lincks pain an sein Rucken auch mus er gar resch miteinander zu gen das fallen auf ain knie vnd das prechen vber das pain

Aber ein solich Ringen den dw füss mustv vor wechsslen / wen dw mit aim gefast hast das Iederman sein rechten arm vnter hat so fal Ie auf ein knie Vnd mach In Ir vnd wen es dir eben sey das er sein Rechts pain fur gesetzt hat so wurff dich vor Im vmb vnd fal auf dein lincks knie vnd setz Im dein rechts pain auswentis neben sein rechts pain vnd wurf In vber das pain an den Rucken / vnd mit der lincken ober handt ober bey seim rechten arm bey der meus da prich In starck nider vnd mit deim rechten arm vnter seim lincken vchssen wurff starck nach das mus als mit einander starck vnd Resch zugen