EIn dagalt Ringen. dw magst woll sprechen zu einem dw wolst Im dein pain in die handt geben / vnd er kin dich darnach nicht werffen / vnd muss selber fallen / Das thue also heb dein rechts pain auff / vnd hais dich In vassen / bey der kniepueg vnd In dem vassen / als er dich vast / So greiff Im mit deim rechten arm vmb sein hals / das dir sein kopff vnter dein vchssen kim / vnd truck den vast zw / vnd mit der lincken handt fas In oben auf dein rucken / bey der gurtl / vnd wen er dich auf will haben bey dem pain So hab dich fast mit der lincken handt bey der gurtll vnd mit dem rechten arm truck das vchssen fast zw So truckts dw In bey seim hals das er vnwissen wirt vnd auf den pauch fellt
- Aber ein solich dagalt ringen dw machst wol sprech[e]n zw armen / ich will dir den Rucken keren vnd will mich aufheben lassen vnd will dich dannach werffen / das dw also / wen dw aim den rucken kerst vnd er dich bey der mit nymbt / vnd will dich auf heben So fall Im mit dein henden in sein hendt vnd schwer dich resch nider / vnd far im mit deym rucken / vnd fussen / durch sein rechts vchssen vnd mit dem rechten pain hinter sein rechts pain vnd sper im das mit deim rechten pain vnd greiff dan vor dir vnd Im nyder mit dein henden vnd heb im sein rechts pain pain (sic) auf vnd wurff in an den Rucken
Aber ein dagalt wiltw zwen nider werffen die dich aber fassen lassen so heiss sy neben einander steen vnd peug vnd leg Iglichen arm auf den Ruck vnd stos In den dein arm dadurch vnd greiff in In die goller vnd fass sy also recht / das sy dir die arm nicht neme[n] vnd wig In ir arm mit dein arm auf vnd truck sy zw der erden oder wurff sy vber dein baide pain
- Aber ein dagalt wiltw zwen nider werffen / die sich fassen lassen / so stell sy neben einander / vnd stee hinter sy vnd heis die Iglichen geben / ein handt in dein hendt vnten durch ir pain / vnd fas sy den hintterwerttling bey iren henden / vnd heb sy den paid mit einander auf So gen In die kopff nyder vnd die fuss auff vnd fall[e]n auf die meule[r]
