Page:Cod.I.6.2º.5 8v.jpg

3. Auch sol das Schulgelt das von dem volc^kh gefellet so man Schul helt oder maister macht von Einem dem das der hauptman befülcht, oder der Eltist maÿster auff dann dabei so der haubtman nit da were Empfanngen auch darnach den haubtman vber zalt vnd Beÿ Ein ander behalten vnd nit getailt werden bis an den Nechsten tag darnach so Ein jeder maÿster sein Rechenschafft gethan vnd auch alle seine schuld ganz vnd gar Bezalt hat, der Bruderschafft austend auch sollen die maÿster vnser lieben frawen so man schule helt auch Ein tail jn die Bÿxen geben andem guten tag vnser lieben Frawen als sie geboren ward

Zu Mercken/

4. So man New maister machen wil so soll man jne vormenigclichen fürstellen vnd Fechten lassen jn welcher werhe Er begert maÿster zuwerden vnd die maÿster sollen auch alle mit jme Fechten jglicher zum minsten 2 oder 3 geng, vnd jn Offenlich vnd wol versuchen vnd daruach (sic) zu jrem gut duncken zu maÿster machen, vnd als dann so der maÿster auff das Schwerdt nider kniet soll Er vnser lieben Frawen zwen ß auff das Schwerdt Opffern vnd legen, die hebt ain haubtman auff Darnach soll man jne haimlichen versuchen jn dem Capitl darzu soll der haubtman 2 oder 3 maister schicken die jne versuchen jn welcher gewehr Er dann von den selben maÿstern zu gelassen wurd Darin sol man jn maÿster machen vnd Er sich Einem maÿster Schreiben vnd Nenen vnd nit weitter jn seinen Brieff geschriben werden /.