Jttem haben wir Einen Haubtman Erwelt mit Namben Hanns Kauben jm jar 42 vff montag nach marie geburt daseind wir bei Einander geweßen mit Namen Patist Faßnacht von Oppenheim wendel worm mertten Daschner, veltten susß von Biernn Hanns Kerburg von creÿzbnach[1] vnd haben jn gewelt nit Lenger dann i jar /.[2]
Jnn Namen gottes amen zu grosem lob vnnd Eren Der hailigen Drifaltigkait vnd vff das hinfüro Dester Fester Fleisiger vnnd Ordenlicher Dise Freie Ritterlichen Kunst vnnd kaiserlichen Freÿheiten gehannd habt vnnd gebrauchen soll, so haben dise Brüd[er] nota [3] der Kaÿserlichen Freihait des lanngen Schwerdts jn Sannt marx Brud[er]schafft angesehen zu Erheischung vnnd Nuzbarkait solche Nachuolgende Ordnen zube Festigen vnnd auch solchem zu Bleiben lassen wollen vnnd sollen alle nachgeschriben articul vnd Puncten Einem jeden maister Firgehalten werden vnd / sollen auch bei penen vnnd straffen gehalten werd[en] nach Erkanntnus der maister des langen schwerdt vnnd dariber solch vff gelegte straff vnableßlich zu bezallen vnnd zu geben vnd jst solch Ordnung gemacht vnd Befestiget worden Durch dise hernach geschribne maister jst geschechen jm 1534 jar vnd jst zu der zeit haubt man geweßen Laux braun Kürschner Burger zu Franck furth.
