Und wie dw dich mit den hengen und winden emplossen sollt und alle vorgenante stuck zetreiben findestu alles hyenach gelert und geschriben in der auslegung und glosen der zetl etc
- Der text von dem zornhaw mit seinen stucken und arbaitenn
Wer dir oberhawt zornhaw / ort ein draw / Wirt er es gewar / nym oben ab anefar. Zw kopf zw leib / die zeck nit vermeid / Glosa
Wann ainer von seiner rechten seitten mit ainem obernhaw dich zw deinen kopf schlagen will so haw dw auch von deiner rechten seitten mit ainem zornhaw hinwider besunder so er waich am Schwert were und im haw würff im den zornort ein zw dem gesicht und stoβ Sicht er dann das und mercktz und versetzts So nym oben ab und schlag herumb von deiner lincken achsel im zw seiner rechten mit mit(sic) kurtzer schneid gatist neher dann die ander / Und prauch die zeck zw kopf zw leib ob dw magst Dw magst auch wol im abnemen mit der langen schneiden schlagen darnach kriegen oder abhawen von im etc
