[Image]
- Der krumphaw mit seinen stuckenn
Krump auf behende / würff im den ort auf die hende / Glosa
Das ist wie dw krump hawen solt zw den henden den treib also Stee mit deinem glincken fues für und halt dein swert mit dem ort auf die erde fürsich hinauβ krump das ist mit gekreutzten henden das die lang schneid ubersich stee wol in der wag Und das erst stuck nach dem text treib also Wenn ainer dir von seiner rechten achsel mit ainem ober oder underhaw zwhawt So schreit wol zw im hinein mit deinem rechten fueβ indes gegen ym Und lass die kreutzten hendt oder das krump aufgeen vnd setz im den haw ab mit deinem swert mit langer schneid oder ort wol hinüber geworffen auf sein hendt gegen seiner linckenn seitten darnach krieg und arbait wie dw wilt Wurfft er aber dichmit den henden heruber mit gwalt mit seinem aufgeen So lass gern geen und mach herumb umb dem haubt ain straich im zw seiner lincken seitten mit kurtzer oder langer schneid die kurtz get neher Er pricht dir das mit mutieren gegen dir Der haw pricht auch die huet des ochsen Wann ainer gegen dir dar inn stündt so magstu dein krumphaw dargegen prauchenn auch ober und underhaw pricht er Und ist der vier versetzen ainβ wider die vier huten als den ochsen
Regula gib dich in dem krumphaw vast bloβ etc
