Page:Cod.I.6.2º.5 34r.jpg

das dein ee wann dw mit auf kumbst so pleib also unden an dem swert und heb übersich will er dir dann auf der versatzung einhawen oder am swert ein winden so lass yn vom swert nit ab nemen Sunder volge ym daran nach und arbait zw der nechsten plösse mit krieg und anderem

Item merck dw solt ym auβ und mit allen hewen nachraisen als pald dw erkenst das er sich vor dir verhawet oder emplösset mit dem swert

Ain gute lere von dem nachraisen

Wann dw mit ainem vichtest so pind ym starck an sein swert und pleib also starck ligen und druck yn starck auf den kopf will er umbschlagen so pleib an dem swert und druck starck nider so hat er kain macht Also raise ym altzeit starck nach oben zw dem kopf

Im nach ist es ain anders so fleucht er nit sunder stet still und kumbt in die arbait oder krieg mit dir

Es ist ain underschaid under dem nachraisen und in dem nach Nachraisen ist in fliehen Nach ist in still stan nach arbaitenn