Der Hochgelert doctor · Johannes Auentinus · Zeu°get Inn seinem ersten Bu°ch · seiner Chronica · so er von dem herkomen des altloblichen hau°s zu° Bairn gemacht hat · das zu° der zeit Jacobs des Patriarchen · Inn Teu°tschlannden · ein Ku°nig Gampar · oder Kempffer · aber Sächsisch · welche sprach der Teu°tschen zu°ngen am enlichisten zu°gemessen wirt · der Ku°nig · gemper · genannt wirt · [[d]au°on das wort Kempfen seinen vrspru°ng habe; am Rand geschrieben] welche die alten · als Homerus · Orpheus· Ariostiphus · Diodorus · Siculus vnd Strabo · neben vil anndern mer · clärlich bezeu°gen · diser Gampar · hat mit seinen Teu°tschen das ganntz Asiam bekriegt · vnnd das mit seinnem ernstlichen Namen erfu°llet Daher der nam des kampff · oder kempffer als ainer ernstliche hanndlu°ng · seinnen vrspru°~g haben soll · wer aber sich des kampfs zu° dem ersten gebrau°cht · sagt vorgemellter · Auentinus ·das In Hercules · der su°n Osirs · des Ku°nigs der Egiptiern au°ß der Isidis die genannt wirt Ceres · seinem gemahel erborn · den kampff Inn Teu°tschlannden · erstlich gebracht habe · Es seind au°ch etlich die sagen · das lanng vor dem Troianischen krieg In Arcadia · von ainnem lanndsfu°rsten · Licaon · genannt · der kampff gehallten worden seÿ · Damit aber der gu°ethertzig Leser · Inn diser Rechnu°ng nut Irr · oder Zweiffelhafftig gemacht werde · soll er wissen · das diser Licaon · lanng nach dem Ku°nig kampffer vnnd dem Hercule gelebt hat ·
Anno Mu°ndi · 1484 · Vor der gepu°rt Christi vnnsers Hailannds · hat Hercules · mit dem Antheo · seinen kampff gehallten · In au°ß stercke von der erden au°fgehaben · vnd In mit vmbgreiffu°ng der waich in · krefftigelich ertru°ckt · vnnd also ersteckt · dann er In su°nst mit nichten gewinnen mocht ·
Eu°sebiu°s · schreibet das Athletes · der erst Ku°nig der Corinthier · Alsdann Abbas Vrspergensis · au°ch bezeu°get · von der gebu°rt Christi vnnsers Hailands · 1088 · Jar · du°rch sein stercke vnd geschicklichkait · das Ku°nigreich der Corinthier mit Fechten vnd kempffen · vberkomen · das Fu°nffu°nddreÿssig Jar glu°cklich geregiert habe ·
