Ein Zornhaw gögen ainnem lanngen Ort
Item wann du mit Dem zufechten zu dem Man kumpst. so trit mit deinem lincken schennckel zu Im hinnein. vnd halt dein duseggen. mit gestracktern arm. ob deinnem haupt. deiner rechten seitten das der Ort zuruckh hanng. die lanng schneid oben gewendt sey Indes volg mit deinnem. rechten schennckel. hinnach. vnd haw Im. mit dem zorn haw zwifach nach seiner rechten seiten. seines kopffs versetzt er dir das. so stich Im einnen orth zu seinem gesicht oder der. prust. sticht er dir dann also nach deinnem gesicht. so versetzt Im das mit deiner langen schneid vnd trit mit deinem rechten schennckel hinnein Indes. scheusz Im deinen Ort. zu seiner prust. auf sein rechte seitten. versetzt er dir das so volg mit deinnem lincken schenckel hinnach vnd haw Im mit ainem Creitz haw zu seiner rechten seitten. seinnes kopfft / versetzt er dir das furbas. so haw Im mit ainem. vndern haw. nach seinnem rechten arm. Sucht er dir dann deine plosse. vnden vnd oben also. so trit mit deinem lincken schennckel zu Im hinein. vnd versetz Im das. mit deiner. lanngen schneid. Indes haw. Im nach seiner grossen zehen. seines furgesetzten fuosz. begert. er dir das abzusetzen. so stich vnd haw Im behend zu der obern plosse seines haupts.
