Ainn rechte vnnd ain Linnckhe offne hut
Item schickh dich also mit disem Zufechten Im die Recht offen hut stannd mit deinem Rechten fuosz vor mit deinem spieszz vornen. auf der erden dein lincke hannd bey deinem hindern orth dein rechte bey deinem rechten knie. Indes trit mit deinem lincken schenkel hinein des vornen mit deinem spieszz vbersich. vnd stosz Im zu seinem gesicht stoszt er dir dann also dem gesicht zu vnnd du mit deinem lincken fuosz vorsteest dein lincke hand vornen bey deinem lincken knie In deinem spietz dein rechte hinden bey deinem Ort so setz Im seinen stosz ab ausz der offnen hut. Inn die Schrannckhut vnnd setz deinen lincken fuosz zuruckh. Indes wind dich widerumb auf Inn den freystannd. mit gleichen fuossen zusamen. das dein spieszz auf deinem lincken Elnpogen lig. Inndem volg mit deinem lincken schenckel hinnach vnnd stosz Im nach seinem gesicht versetzt Er dir das so volg mit deinem rechten fuosz hinnach vnnd stosz Im nach seiner lincken prust stoszt er dir also zu, so nimb Im seinen stosz ab mit deinem lanngen Ort. von deiner lincken auf dein rechten seite Indes volg mit deinem rechten schenckel hinnach vnnd stosz Im nach seinem gemechten. versetzt Er dir das. so volg mit deinem lincken fuosz hinnach gee mit. deinem spieszz wol auf vber dein haupt. vnnd stich Im nach seinem gesicht stost er dir also zwifach zu. so setz Im das ab mit deinem vorderen orth deines spiesz Indes wechsel Im durch von seiner lincken seiten. auf sein rechte zu seinem gesicht oder der prust vnnd volg mit deinem rechten schenckel hinnach so hastu ainen lanngen stosz. Indem wend dich Inn die offen hut auf dein rechte seite das dein rechter fuosz mit dem winden zuruckh gee vnnd wend dich damit widerumb zuruckh Inn gute versatzung.
