Der Freystannd gögen der Schrannckhut
Item wann du mit dem zufechten zu Dem Mann kumpst. so hallt dich also mit dem Freystannd. stee aufrecht mit deinem leib dein lincke seiten furgewenndt deinen spieszz gögen dem Man auf deinem lincken arm dein rechte hannd gestackt hinden bey deinem Ort. Indes volg mit deinem rechten schennckel. hinnach vnnd stosz Im gewaltig zu seinem leib. stoszt er dir also zu vnnd du Inn dem geschrenkten wechsel steest deinen rechten fuosz furgesetzt gögen dem Man. so trit mit deinem rechten fuosz zuruckh vnnd setz Im seinen stosz ab. wend dich damit auff dein rechte seiten vnnd In dem absetzen so volg mit deinem rechten fuosz hinnach vnnd stich Im nach seinem gesicht. versetzt er dir das so trit mit deinem lincken schenckel hinnach, vnd wechsel Im durch von deiner rechten auf sein lincken seiten stosz Im damit zu seiner prust stost Er dir also oben zu so setz Im das ab mit deinem vordern ort deines spieszz Indes volg mit deinem lincken schenckel hinnach vnnd stosz Im nach seiner prust setzt er dir den stosz ab so gee Im vnnden durch von seiner rechten auf sein lincke seiten vnnd stich Im damit zu der selbigen stat. stosz Er dir also zwifach zu vnnd du mit deinem lincken fuosz vorstest so setz Im den stosz ab vornen an deinem spieszz Indes volg mit deinem rechten schenkel hinnach. vnd stosz Im zu seinem gesicht vnnd zeuch deinen rechten schenckel wider zuruckh deinen spieszz vornen auf der Erd vnnd far mit deiner rechten hand wol vber dein haupt. das dir der spieszz vor deinem gesicht stee raist es dir dann nach. so stosz ainem langen stosz auf In mit deinem spiesz wend dich damit zuruckh In gute versatzung
